NAIARA FIGERO ETA MIKEL EGIA

Naiara Figero eta Mikel Egia Euskal Herriko bi 3D artistak dira.

Naiarak info-arkitektura arloan egiten du lan Areetako estudio ezagun batean, aurrekontu handiko erreforma proiektuetan. Bere eguneroko bezeroek diru galanta sartzen dute beraien etxeak eguneratzen eta hori Naiararen 3D grafismoen exigentzia mailan islatzen da. Beste alde batetik, bere proiektu pertsonalek argazkigintza eta 3D irudiak nahasten dituzte zientzia fikziozko irudietan. Mikel, aldiz, pertsonaietan espezializatu den 3D modelatzaile eta texturizatzailea da, baina beste arlo batzuetan ere eskarmentu handia du, adibidez, argiztapenean. 2019ko martxoaren 15ean estreinatuko den Ilion estudioko  Wonder Park filmean argiztapen lanak egin ditu 2017 eta 2018 urteetan.

Biek ala biek enpresa mailan eta freelance bezala eskarmentu handia dute, eta, gaur, Algortako kafetegi baten bildu gara Harrobiako 3D ingurune elkarreragile, animazio eta bideojoko zikloko ikasleek helarazitako galdera batzuk erantzuteko.

                                                                                                                            Mendatako Mikel Egia eta Bilboko Naiara Figero

Ander: Kaixo Mikel eta Naiara. Harrobiako ikasleen galdera batzuk ditut zuek erantzuteko eta lehenengoa Ikerrek bidaltzen digu. Honela dio: Inoiz pentsatu duzue atzerria joatea lan egitera?

Mikel: Beti izan dut ideia hori buruan. Pixar, ILM eta horrelako estudioetan lan egiteko, baina denbora pasa da, nagusiagoa naiz (35) eta orain ez dut hain argi ikusten kanpora joatearena. Gainera, existitzen den teknologiarekin: Skype Dropbox, internet… Gaur egun errazagoa da etxetik lan egitea. Hori bai, gauzak galtzen dituzu bidean: talde batekin lan egitea, jende berria ezagutzea… Hori galtzen duzu.

Naiara: Nik 35 urte ditut ere eta, egun, eskaintza pilo bat sortu zaizkit kanpora joateko.

Baina nahiz eta hasieran hori pentsatu, orain nagia ematen dit mugitzeak. Hori bai, esperientzia baliotsua iruditzen zait eta animatzen ditut ikasleak kanpora joatera.

Mikel: Neuk, adibidez, Madrilen lan egin nuenean, esperientzia hori eduki nuen nolabait (familia utzi eta abar); baina atzerrirako saltoa ez dut planteatzen.

Ander: Lehenengo mailako Enekok galdetzen du: Inoiz ateratzen zarete festan? Zuen lanak uzten dizue denbora librea horretarako?

Mikel: Hori beti. Ni asteburu honetan bertan atera naiz. Baina intensitatea, noski, ez da 18 urtetan ateratzen ginenean bezalakoa. Goizeko 6etan ez naiz bueltatzen etxera; baina, bai. ateratzen gara.

Naiara: Ni 16 urterekin hasi nintzen 3D munduan eta inor baino gehiago ateratzen nintzen parrandan. Gero etxean orduak ematen nituen lanean baina, gaur egun, ez dut festatan atera behar izateko grina hori. Ez lehen bezainbeste, behintzat.

Ander: Xabierrek galdetzen du: Zelan hasi zineten 3D industrian lanean?

Naiara: Betidanik marraztu dut, baina egun zehatz batean, nere nebarekin Jurassic Park ikusten ari nintzela, galdetu nion zelan egiten zan hori eta berak 3D zela azaldu zidan. Orduan gelditu nintzen 3Drekin txundituta. Ez zegoen ez ikastolarik ez libururik 3D ikasteko eta ni bakarrik hasi nintzen ikasten.

Ander: Eta zure lehenengo 3D lana?

Naiara: Lan eskaintza bat ikusita aldizkari batean. Beraiek Cinema4D erabiltzen zuen norbait bilatzen zuten eta aste baten ikasi nuen programa hori elkarrizketara aurkezteko. Bi pertsona aurkeztu ginen eta sortea eduki nuen lana lortu nuelako. Nahiz eta oso emaitza kaskarrak egin garai horretan.

Mikel: Unibertsitatean lagun baten CD bat utzita. Disko horretan programa batzuk zeuden eta horiek ikasi nituen. Gero nire lehenengo lana Baleuko izan zan Betizu, Olentzero eta horrelako filmetan. Eta behin hor sartu zarela, jendea ezagutzen duzu eta kontaktu horiekin aurrera jarraitzen duzu.

Ander: Oso ondo. Beno, hemen galdera teknikoago bat daukagu. Lehenengo mailako Olatzek galdetzen digu: Zelan optimizatu dezakegu objektu asko dituen eszena bat?

Mikel: Elementu ezberdin bakoitza artxibo ezberdinetan lantzea eta gero proxy moduan ekarri azkenengo eszenara. Gero, argiztatzerakoan, zuen Mayako eszenan utzi bakarrik planoan ikusten dena. Optimizatu. Beerbugen hori egin genuen adibidez. Bestela infernua da.

Ander: Eta testurak optimizatzen zenituzten?

Mikel: Gaur egun hori ez da beharrezkoa filmetan, MipMapping teknologiak hori kudeatzen du automatikoki.

Ander: Eta zuk Naiara. Zelan kudeatzen da hori info-arkitekturan? Argiak pase ezberdinetan edo?

Naiara: Dena eszena bakar baten egiten dut eta gero pase bakarra. Beauty pass bat. Ez ditut pase ezberdinak egiten.

Ander: Beno, hurrengo galderara pasako gara. Aitorrek galdetzen digu ea industria honek etorkizunik daukan modelaketa eta testurizatze-lanak.

Mikel: Irudiaren garaian bizi gara. Gero eta produkzio gehiago daude. Etorkizuna ikusten diot, baina pentsatu beharko duzu zein eremutan lan egin nahi duzun. Adibidez, nahi baduzu filma haundietan lan egin, hor konpetentzia gehiago egongo da, baina produkzio txikietan lekua dago beti.

Naiara: Ni askotan borrokatu naiz horrekin. Gaur egun asset bilduma pilo bat daude non elementuak modelaturik dauzkazun jada. Baina, gero, sofa zehatz bat nahi duen bezero bat datorkizu eta beharrezkoa da jakitea modelatzen eta testurizatzen elementu konkretu hori. Gaur egun gure estudioan, luxuzko etxeak egiten ditugu eta gure renderrak fotorrealistak eta zehatzak izan behar dira. Ez du balio bozetoa izatea, gero errealitate birtualean erakutsiko baitiogu bezeroari.

Ander: Azkenengo galdera. Maiderrek galdetzen digu. Zein pelikuletan lan egin duzue eta zein ezberdintasun daude pelikula eta jokoen arteko modelaketa lanetan?

Mikel: Gaur egun ez dago aldaketa handirik oinarrian. Orain arte pelikula txikietan, serieetan, pelikula handietan eta jokoetan tokatu zait lan egitea eta ez dut hainbesteko aldea ikusten. Bakoitzak bere berezitasunak ditu, noski, baina ez hainbesterainokoa.

Hori bai. Nahi badituzu AAA joko bat eta mugikorrekoa konparatu, ezberdintasunak daude muga aldetik. Baina PS4ko joko baten modelaketa mailak eta pelikula batenak, prozedura aldetik. ez dauka hainbesteko alderik.

Ander: Ba honekin amaitzen dugu ikasleen galderekin. Eskerrik asko Naira eta Mikel gure galderak erantzuteagatik.

Elkarrizketa podcast formatuan jarraitzen du hurrengo estekan:

HARROBIAPODCAST3D

Naiararen lanak ikusteko, jo hurrengo helbidera: https://www.3dtrass.com/

Mikelen moldeaketa eta textura  lanak hurrengo estekan ikus ditzakezue:  https://vimeo.com/136916514

Wonder Park filmeko trailerra:  https://www.youtube.com/watch?v=VML6rQWssSk

Audio osoa hemen